هويَّة مدونة That Red Lip الجديدة ❤ That Red Lip New Blog Style



السلام عليكم ورحمة الله وبركاته ..

زي ماتشوفون تغير شكل وهويَّة المدونة ❤ـ
( إذا كنتي فاتحة المدونة من جوالك مابيطلع لك شي )
فرحانة جداً جداً جداً اليوم بإطلاق شعار وهوية مدونتي الجديد وأيضا في التويتر 
وكمان البزنس كارد جاهز ❤ـ

طبعا أول شي وقبل كل شي أشكر الله على توفيقي وتعاوني مع المصصمة (Grapic Designer) سهام 
تعرفت على سهام من مشروع متجر قرطاسية، كانت تصمم مستندات printable وهي مستندات يومية قابلة للطبع مدعومة من قبل متجر قرطاسية وكان تعاون جميل ومفيد ..
من أول ماشفت تصاميمها حرصت إني أتبعها في كل وسائل التواصل الإجتماعي لأن من جد البنت موهوبة وأفكارها مبدعة ماشاءالله، كنت أتابعها على تمبلر وقلت لو بتعاون مستقبلا مع شخص محترف ومتجدد بأفكاره أكيد بتكون سهام ❤ـ


تواصلت معاها عالايميل وشرحت لها أفكاري وهي كمان ساعدتني كثير بالأفكار وماشاءالله وصلنا لحوالي أكثر من 7 تصاميم بس إضطريت أن أختار واحد منهم، كنت أبغااهم كلهم p; بس أنا كنت متطلبه كثير ههههه كنا نغير كثير في الخط والألوان والتصميم كل شي كان حلو وكانت كل مره تقترح عليّ أفكار أحلى وأجدد بس حسيت نفسي أنا حبيت هاذا التصميم ألوانه والشعار كذا أحس من جد أنا ويمثِّل مدونتي ❤ـ
وإلى اليوم الصباح وإحنا نعدل في التصميم، صار لنا أكثر من شهر إيميلات رايحه وإيميلات جاية

شكل المدونة سابقاً:

والتويتر سابقا:


شكل المدونة الآآآآآآآن *ـ*

والتويتر *ـ*

لي تقريبا في التدوين 7 أشهر وأعطيت القليل القليل من عندي *ـ* والقادم أكثر ..
أحب مجال التدوين وجربت أفتح مدونة من قبل بس ماكان فيه شجاعة أو حماس إني أكمل وأهملتها، بس كنت أنتظر فرصة مناسبة أتفرغ عشان أشتغل على حلمي بالتدوين وجاتني الفرصة بعد تخرجي من الجامعة مباشرة ..

كنت محتاره في إيش أدون كل شي حولي أحبه من كتب، اهتمامي بالتنمية البشرية ( تطوير الذات )، الأكل، اعمال يدوية، مكياج ، أزياء، مسلسلات، أفلام وغيرهم .. 
بس حطيت هدف ومهمة لمدونتي عرفت عن إيش أدون فـ في البداية هدفي التدوين والكتابه ومشاركة البنات عن كل شي متعلق بالمكياج والفاشن والأعمال اليدوية والكتب والأشياء اللي يحبوها البنات ومن إهتماماتنا ..
ولمن نحط هدف مستمر لازم يكون لي هدف مستقبلي وأنا من ورا مدونتي لي هدف مستقبلي أعمل عليه ليلا ونهارا حتى يرى النور إن شااااااءالله ❤ـ
مدونتي أحسها زي طفلي أو زي النبته، أعطيها كل الحب والإهتمام والصبر والرعاية عشان تكبر وأنا فخورة فيها .. 

أما بالنسبة لمُهمَّتي فأنا أعتبر نفسي إني في مُهمة ولازم أستمر عليها، وهي أن أوصِّل رسالة للبنات وللنساء أن المكياج هو مجرد تكميل وليس أمر مطلوب ، وأشجع الجيل الجديد على الثقة والذكاء وتحريك الشابات والفتيات على حب الخير والإعتماد على النفس..

وبعد ماشفت ولاحظت الإقبال على مدونتي قلت لازم يكون لي هوية وأكيد بعد إطلاق الهوية الجديدة متحمسة أكثر وأكثر إني أكمل وأكتب كثير من التدوينات على قدر ما أستطيع، لأن أنتو أنتو المتابعات والداعمات اللي تخلوني أستمر، بإعجابكم بالتدوينات وبتعليقاتكم وبمدحكم وإنتقادكم كله يهمني عشان أطور من نفسي ومن مدونتي ليرقى بالشكل المطلوب ويقدَّم لكم جميلاً ..

- وعلى فكرة بنات ترى التدوين مايربّح من الناحية المادية أبدا وكل شي أتكلم عنه في التدوينة أو تغيُّرات أسويها للتدوينه فهي من جيبي الخاص، التدوين يربحك قلوب تحبك وتدعمك وتوقف معاك بالحلوة والشينه وناس حلوين يدعولك، هاذا اللي لاحظته من خلال تواصلي مع البنات متابعاتي في تويتر وإنستقرام ..

- لو لاحظتو هذه أول تدوينة أتكلم فيها عن نفسي وعن مدونتي، إذا تحبون هاذا النوع من  التدوينات الشخصية وإذا تحبو تعرفو عني أكثر قولولي، عشان أكتبلكم أكثر *ـ*

أحبك سهام و شكراً جزيلا أكيد لنا تعاونات قادمة 

( الكلمات اللي بخط كبير هي روابط)

قولولي إيش رأيكم بالهوية والشعار الجديد؟
رأيكم يهمني جداً جداً جداً 

أي سؤال أو إستفسار يسعدني ردك هنا في خانة التعليقات أو:

إيميل: ThatRedLip@gmail.com
تويتر: ThatRedLip@
أنستقرام:ThatRedLip@
 سناب شات: ThatRedLip
 أسماء

أحبكم كثير 
Much Much Love, ASMA xo

1 comment

  1. جميييييل حبيت النيولوك
    الله يوفقك يا رب

    ReplyDelete