#ThatRedLipGoesToJeddah أربع وعشرين ساعة في جدة

السلام عليكم ورحمة الله وبركاته
حبيت أسوي سلسلة جديدة يعني إذا رحت مكان أو سافرت وحسيت الموضوع يستاهل تدوينة بكتبها في هالسلسلة ThatRedLipGoesTo# وحبيت أبدأها بسفرتي اللي ماتعدت 24 ساعة لجدة، بنبدأها من مطار الدمام رجوعا لمطار الدمام، بعض الصور بتكون من انستقرام وسناب شات

رحلتي كانت على طيران ناس 17/3/2015 الساعة 6:55
بقول كلمة حق ( من أسوأ الرحلات اللي جربتها) قعدنا ساعة كامله في مطبات هوائية، الطيارة ضيقة جدا كأني قاعدة في جحر، الضيافة بفلوس وعلى أشياء ماتسوى، ووصلنا جدة في خلال ساعتين و١٠ دقايق

ووصلنا جدة ورحت الفندق، سكنت في Le Meridien وكان قريب من التحلية فقررنا نروح مشي إلى التحلية ( كلها كان مشوار ربع ساعة) وبالسيارة كانت بتاخذ أكثر من نص ساعه >> مخ (:

كنت محتارة إيش أجرب بس وقع الإختيار على Shake Shack جربت Shake Burger الكلاسيك، أنا مايشبعني إلا البرقر وقلت خلاص بكرا بجرب Chese Cake Factory

رجعت الفندق وسويت للبنات room tour في السناب تشات
ونمت 

على بال مايجي الفطور نقرأ شوي ( باقي شوي وأخلص الكتاب) حبيت يكون معاي لأنه المقالات خفيفة وأسلوبه سلس وسريع، يوصلك للنقطة المطلوبة بدون سجع وك

فصور صباح الخير ياجدة، ماحسيت على نفسي إلا الساعة 10ونص كان المفروض أصحى وأفطر برا بس كنت تعبانة وقتها فطلبت فطور من الفندق

خليني أخذكم في جولة على الغرفة:
الغرفة تطل على شارع المدينة ( فيو تجاري بحت)









توني أستوعب إني نسيت أصور جهة التلفزيون ( واضح إني ماأهتم فيه، أصلا ماشغلته أبد )

والحين وقت التجهيز للإيفينت

هالعلب أخذتهم من سنتر بوينت، مره حلوين وعمليين، كان منهم ألوان إخترت البنفسجي 


شعري كان مبلل أخذت ضغطة من زيت الأرغان المغربي MiracOILicious Moroccan Argan Oil من صيدلية وايتس عشان يعطي شعري لمعه ويخفف النفشة وأسوي مساج خفيف، بعدها بخيت من بخاخ تريسيمي Tresemme Thermal Creations لحماية الشعر قبل إستخدام السشوار، إنتظرت شعري ينشف بالكامل وإستخدمت اله جوسي ايبير سويت ويفي كبير

إستخدمت للشادو درجات اللون الوردي والبني من باليت Naked3 وسويت كونتور بسيط بإستخدم باليت انستازيا والأهم من كذا فاونديشن نارس الجميل اللي ماأستغني عنه، حبيت أخلي اللوك طبيعي جدا لأني لابسة فستان أبيض وشعري مصبوغ بخصل بنفسجية والإكسسوار لولو

أحلى مافي هالمكتب الساعة الرقمية شبكت عليها آيبادي وقت التجهيز منها سبيكرز ومنها شحن للآيباد

الفستان من توب شوب ( مبين إنه توب وتنورة بس هو فستان وفيه قصة على الأطراف بس التوب مغطي عليه )
الهيلز من ناين ويست ( موجود حاليا )

عقد اللولو من زارا ( موجود حاليا )
الأسوارة من آكسسورايز ( موجود حاليا ) الحلو فيها تتضيق وتتوسع على حسب مقاس يدك
الحلق من كارولينا هيريرا
نسيت أصور الساعة والخواتم لأن ماكنت ناوية عليهم بس وأنا طالعه لبستهم

آخر شي رشة عود من جنيد وركزت على أماكن النبض
( لو أقولكم إيش كثر أحب هالعود ماتصدقون، كل يوم أستخدمه للدوام وبعد الشاور وفي المناسبات ريحته خفيفة ماتصدع الراس وثابت وكل من مر بجنبي يسأل عنه )

تجهزت للإيفينت وإذا حابين تشوفون تفاصيل وصور أكثر شيكو على تدوينة:  تغطية إيفينت إطلاق ماسكارا بينيفت الجديدة رولر لاش Benefit Roller Lash Mascara Event #RLME

خلصت من الإيفينت ورجعت للفندق أخذ شنطتي ومنها على المطار
رحلتي كانت على الخطوط السعودية الساعة 11
صحيح تأخرنا نص ساعة في الإقلاع بس الطريق كان سلس، مرينا بمطبات بس الكابتن شاطر ووصلنا في خلال ساعه و٤٠ دقيقة

باي باي جدة
إلى وقت لاحق 

حابة أقرأ تعليقاتكم! إذا يعني حبيتو هالنوعية من التدوينات 

إيميل: ThatRedLip@gmail.com
تويتر: ThatRedLip@
أنستقرام:ThatRedLip@
 سناب شات: ThatRedLip

 أسماء

10 comments

  1. مررره حبيت التدوينه و حبيت فكرتها نستفيد من تجربتك و الاشياء الايجابيه و الاشياء السلبيه فيها

    ReplyDelete
  2. جميلة الفكرة👍💪

    ReplyDelete
  3. تدوينه جميله وسلسه وتحمس 👌👌👌 كثري من هالتدوينات

    ReplyDelete
  4. رووووعه التدوينه ومبين كتير انو انتي منظمه ومرتبه ... واللبس نايس ع قولتك كنت حسألك عنو بس منيح حكيتي عنو ...

    ReplyDelete
  5. وعليكم السلام ❤ لبسك ناعم وانيق ماشاء الله ❤_❤ حبيت هالنوعية من التدوينات استمري ❤

    ReplyDelete
  6. مرّه حبيت التدوينة تجنن السلسلة ♡ ولبسك أنييق حبيته ����

    ReplyDelete
  7. مره حبيتها ياليت تتكرر و لبسك مره أنيق ��������.

    ReplyDelete
  8. مرا شي جميل حسستيني بطعم جدة عههههه. حسيت اني سافرت صراحه استمري

    ReplyDelete