Tuesday, March 22, 2016

Makeup Removers Review and How I Remove My Makeup تجربتي مع مزيلات المكياج وطريقتي المفضلة في إزالة المكياج

السلام عليكم ورحمة الله وبركاته

كلنا نحب نحط مكياج و الأغلبية يعرف أهمية إزالته وكيف أن راح يأثر سلبا على البشرة في حال ما زلناه بالطريقة الصحيحة ومنها: ظهور التجاعيد في سن مبكره، جفاف البشرة، سد المسام وبالتالي بتطلع الحبوب والبثور وأيضا يسبب في تصبغ البشرة، فيعني ليش تعرضين نفسك لكل هالمشاكل والحل موجود .
 فيه بنات أعرفهم مايشيلون مكياجهم وينامون فيه، وفيه بنات يغسلون وجههم بغسول البشرة وعلى بالهم راح المكياج
وفيه بنات شخصيا إعترفو لي أنهم إذا حطو بيبي كريم ومكياج خفيف جدا ماينظفون بشرتهم وإذا حطو فاونديشن ومكياج ثقيل لا يهتمون ويشيلون مكياجهم وهذا الكلام وصلني من أكثر من بنت ):

جربت أنواع وطرق لإزالة المكياج وحبيت أفيدكم باللي نفعني واللي ماحبيته
بتكلم في هالتدوينة عن الأنواع اللي جربتها، طريقتي في إزالة المكياج والقطن اللي أحب أستعمله 

Benefit They're Real Remover مزيل مكياج ضد الموية وطويل الأمد من بينيفت
قوام المنتج: جل كريم
يناسب العيون الحساسة واللي يلبسون عدسات لاصقة يوميا لأنه لطيف وخفيف
مزيل المكياج هذا مخصص لماسكرا وايلاينر They're Real لأن إزالتهم صعبة فقررت بينفت تسوي هالمنتج، أنا أشوفها حركة ذكية من بينفت أنهم سووه للماسكرا لأن بالفعل الماسكرا صعبة في الإزالة وحتى لو شلتها إلا يبقى لها أثر اليوم اللي بعده
بالنسبة لي حاليا أستخدم هذا لمكياج عيوني ومو لازم أكون حاطة من منتجاتهم طبعا
بس شفت أنه فعال في إزالة مكياج العيون ويزيله تماما
أستخدم معاه القطن وأحط كمية تناسب العينين وأمسح مكياج عيوني وبعدين أغسله بالمويا

 Clinique Makeup Remover مزيل مكياج العيون والشفايف من كلينيك
قوام المنتج: زيتي
جربته بطريقتين: مع القطنة وبدونها
بس ماحبيته أبدا، صحيح يزيل المكياج بس مو من أول مره و يعطي منظر مزيت ودهني للبشرة
بعد يخلي منظر البشرة فيه طبقة لامعة حتى بعد ما أغسل وجهي بالغسول

The Body Shop Camomile Sumptuous Cleansing Butter زبدة منظف ومزيل المكياج بالبابونج من ذا بودي شوب 
قوام المنتج: زيتي أو زبدة 
صحيح قوام المنتج زيتي و شكله زي الزبدة بس تاخذين منه بأصابعك وبيذوب فيها، وأستخدمه مباشرة على وجهي بحركات دائرية أو بطريقة المساج على كل الوجه مع العيون بكذا يكون أزال كل المكياج وبعدها أغسل وجهي
من جد ينظف البشرة من المكياج ويخليها ناعمة ورطبة
من المنتجات اللي أحبها بس فيه عيب أن كل مره أحط يدي فيه أحيانا ما أنتبه إذا كانت نظيفة أو لا فصار يسبب لي حبوب ببشرتي
مع إني أحرص على غسل يدي بصابون الديتول بس لمن آخذ أكثر من مره يصير فيه آثار مكياج في المنتج نفسه
وقفت إستخدامه حاليا بس ممكن أرجع له
يناسب جميع أنواع البشرة

نجي عند النوع المفضل لي حاليا وأبدا وهو مزيلات المكياج ذو القوام الزيتي
من اليمين:
The Body Shop Camomile Silky Cleansing Oil مزيل المكياج الزيتي من ذا بودي شوب 
الزيت يحتوى على البابونج، قوامه سميك شوي، ريحته جيدة، وعلى حسب وصف الموقع فالمنتج مهدئ للبشرة ، سمعت أن حاليا غير متوفر وله بديل بس ماجربته
اللي ماحبيته فيه أن يخلي البشرة شكلها مزيت بس طبيعي أن بغسل وجهي بالغسول وبيروح هذا الإحساس

و Mac Cleanse Off Oil مزيل مكياج ماك 
زيت منظف من ماك، قوامه أخف من مزيل مكياج ذا بودي شوب، ريحته حلوة
شوي من المنتج يكفي لكل الوجه والعيون، أحبه وأخليه للمناسبات عشان أشيل فيه مكياج عيوني بعد لأن أخف من مزيل مكياج ذا بودي شوب مع أن يغبش العيون بس يشيل مكياج العيون الثقيل بسرعة وأوفر من القطن يعني أخليه بس لإزالة مكياجي اليومي

Coconut Oil زيت جوز الهند
زيت جوز الهند كنت أستعمله قبل لا أعرف عن مزيلات المكياج الزيتية، عندي هذا النوع إسمه Nature's Way أخذته من iHerb.com وممكن تجيبين أي نوع ثاني غيره، بس اللي لاحظته أن هالنوع خفيف على البشرة ويزيل المكياج ويخلي البشرة نظيفة، صار الحين  فيه أنواع كثيرة متوفرة في السوبرماركت، أذا بتشترين من التميمي جربي نوع إسمه أرض الطبيعة يعتبر نقي وعضوي. راح أرجع لزيت جوز الهند بعد ما أخلص مزيل المكياج الزيتي من ذا بودي شوب، أحيانا أحس بشرتي تحتاج منتج طبيعي

طريقة إستخدامي: أصب شوي من الزيت في علبة صغيرة تكفيني لفترة قصيرة عشان مو كل يوم أفتح العلبة وأخذ منها، وأبدأ أسوي زي المساج بحركات دائرية خفيفة على البشرة وبعدها بيذوب المكياج وأغسل وجهي بالمويا، أحيانا أخلي وجهي بعد إزالة المكياج بدون ما أستخدم غسول البشرة عشان أستفيد من زيت جوز الهند على بشرتي وقبل لا أنام أغسل بشرتي وأحط كريمات روتين الليل .

من فوائد إزالة المكياج بزيت جوز الهند: مع الإستعمال المستمر تصير البشرة مشرقة ونضرة، يحتوي زيت جوز الهند على أحماض دهنية بجزيئات صغيرة جدا تقدر تدخل لخلايا البشرة و تساعد على القضاء على البكتيريا والفطريات داخل الجلد فيقلل من نسبة الجلد الميت، أيضا يحتوي على فايتمن هـ ( E ) اللي يساعد على تخفيف التجاعيد وعلامات التقدم بالسن، وبعد زيت جوز الهند لطيف على الشفايف بحيث أن يعالج التشققات ويرطبها، لو بحثتو أكثر بتلقون فوائد أكثر من اللي قلتها.

العيب الوحيد اللي يتشاركون فيه منتجات إزالة المكياج ذو القوام الزيتي أنهم يغبشون على العين، يعني حاولت أن ما أحطه على العين مباشرة ويصير أشيل المكياج من تحت العين ومن عظمة الحاجب على داخل العين بس برضو يدخل المنتج داخل العيون ويسبب حكة وعدم رؤيا واضحة، عشان كذا صرت بس أستخدمه على وجهي بس

طريقتي في إستخدام الزيوت لتنظيف البشرة من المكياج:
أرج العلبة عشان ترجع المكونات تتجانس مع بعض، ويدي تكون جافة أخذ ضغطة أو ضغطتين من المنتج وأبدأ أستخدم المنتج على كامل وجهي بحركات دائرية خفيفة ناعمة، لازم ننتبه أن الوجه لازم يكون جاف يعني مانبلله بمويا، لأن المزيل بيشيل لي كل المكياج ويكون فعال أكثر على بشرة جافة

مزيل المكياج من بيوديرما ذو القوام المائي الخالي من اللون والرائحة الخالي من الكحول
Bioderrma Sebium H2O الأخضر، مخصص للبشرة المختلطة للدهنية
Bioderma Sensibo H2O الوردي، مخصص للبشرة الحساسة
التركيبة تختلف شوي بينهم لكن يعطون نفس النتيجة وهي تنظيف وإزالة المكياج وأيضا يعتبر تونر وتهيئة للبشرة قبل إستخدام الكريمات، بالنسبة Bioderrma Sebium H2O الأخضر يساعد على إعتدال الدهون في الوجه وسد المسام لأنه مخصص للبشرة المختلطة والدهنية فهذا اللي تحتاجه البشرة بعد إزالة المكياج 

بالنسبة لتجربتي:
ماحبيت أبدأ أزيل مكياجي فيهم، حسيت إني أستخدم كثير من المنتج ومايشيل لي مكياج العيون بسرعة زي مزيلات المكياج بالقوام الزيتي، فخليت هذه الخطوة كخطوة أخيرة في إزالة مكياجي عشان بس يزيل لي بقايا المكياج وخاصة العيون وبالفعل المنتج ما أستغني عنه، بالنسبة إيش حبيت أكثر الوردي أو الأخضر!! فحبيت الوردي أكثر لأن ما قدرت أستحمل ريحة Bioderrma Sebium H2O الأخضر فيه ريحة خيار غريبة أو يتهيأ لي بس ماحبيته أبدا

نقطة أخيرة إنتبهو تخلونه مفتوح لأن المنتج يتبخر، مره نسيته مفتوح في الدرج ولمن رجعت بعد العزيمة لقيت نص المنتج متبخر والحمدلله كان الأخضر لأني ماحبيته أصلا (:

نوع القطن اللي أحب أستخدمه هو من سنيتا Sanita Charm Makeup Round 80 Pads
يحتوي على 80 قطن مدور
أحب خامة وجودة القطن في هالماركة، خفيف على البشره ومايمتص المنتج كله
دايما ألاقي عليه عرض في بنده ( 3 حبات بسعر إقتصادي ) سعره بالعرض حول 17 ريال
أما سعر الحبه فهو أتوقع 9 ريال
من سنين وأنا أستخدم هالقطن ومافكرت أغيره بس أحيانا ماألاقيه في السوبرماركت والصيدليات فأخذ قطن من ذا بودي شوب، حلو وخامة القطن ناعمة وماتمتص من المنتج كثير

بالنسبة لطريقتي الحالية من بين  كل هالمنتجات
أول شي آخذ قطنة وأحط من Benefit They're Real Remover مزيل مكياج ضد الموية من بينيفت وأمسح فيه مكياج عيوني والماسكرا
وبعدين أستخدم The Body Shop Camomile Silky Cleansing Oil مزيل المكياج الزيتي من ذا بودي شوب وأشيل فيه مكياج وجهي كله بنفس الطريقة اللي تكلمت عنها
وبعدها أغسل وجهي بالغسول، أمسح وجهي بالمنشفة بطريقة الطبطبة والتربيت، مهمة جدا هالطريقة بحيث أنها تساعد على تأخر ظهور التجاعيد
وبعدها آخذ قطنة وأحط شوي من بايوديرما وأشيل البقايا اللي حول عيوني بطريقة الكبس وبعدها أسحب مره وحدة، لأن كثرة السحب يمين ويسار على العيون يسبب ظهور التجاعيد والخطوط الرفيعة
وآخر خطوة أكمل باقي روتين الترطيب من سيروم، جل، كريم مرطب
بهذه الطريقة أنا أرتاح لمن أحط مكياج كل يوم وأعرف إن خطوات تنظيف المكياج بتريحني وتخلي بشرتي أفضل

اللي حابة أوصله لكم أن أبدا لاتهملون تنظيف بشرتكم من المكياج، كثير يشوف أن هذه خطوات كثيرة بس لمن تتعودين عليها بتشوفين أن بأقل من 10 دقايق إلا وأنتي مخلصة، بس التعود والإلتزام بالبداية يحتاج مجهود ووقت

قولي لي عن تجربتكم في إزالة المكياج! وايش المنتجات اللي تحبونها وكيف طريقتكم!

ولاتنسون لو حبيتو التدوينة شاركوها مع من تحبون من خوات، قريبات، صديقات بيسعدني هالشي مره 

إيميل: 
ThatRedLip@gmail.com
تويتر: ThatRedLip@
أنستقرام:ThatRedLip@
 سناب شات: ThatRedLip
 أسماء 

11 comments:

  1. يعطيكي العافيه أسماء ع التدوينة المهمة
    شخصيا فعلا لاحظت أهمية ازالة المكياج، زمان اول ما بدات احط كنت انام بدون ما امسحه ووجهي دايما حبوب 😱
    بعدها اتعودت امسح لكن بس بغسول الوجه او حتى بس مزيل مكياج عادي زي بيوديرما ومويا خفت الحبوب لكن مازال يطلع حبيبات كتير في وجهي
    حاليا استخدم نفس خطوات والحمدلله وجهي فرق شاسع وواضح

    اتفق معاك في المنتجات الزيتيه جدا ممتازة وسريعه
    جربت منتجات البابونج وزيت جوز الهند وعاشقتهم 😍😍
    ما احس اني بجرب شي غيرهم

    شكرا اسوم ، واتحفينا دايما بجديدك ❤❤

    ReplyDelete
  2. اناماعندي مزيلات للامانه استخدم زيت زيتون ..وبس💜افكر اجيب زيت جوز الهند🤗

    ReplyDelete
  3. معلومات حلوه وجميلة حبيت التدووينة ..جربت مزيل بودي شوب بفيتامين e جميل كان ويعطي طبقه وحاليا استخدم المناديل مع مزيل بودي شوب بالبابنوج بس مو زيتي عادي سائل

    ReplyDelete
  4. شخصياً جربت أشياء كثير كثير .. ولكن بعد تجربتي للصابون الأسود african black saop أخذه من أمازون عامل زي الحجار مو اللي يجي مُعلبّ, بعد استخدامي للصابون الأسود أشوف كل منتجات و طرق إزالة الماكياج ضياع للوقت و ضياع فلوس كمان .. هذا الصابون طبيعي 100% وهو أصلاً صابون علاجي ينظف البشرة من قلب يزيل الماسكارا المقاومة للماء و حتى منتجات اخفاء الحواجب يشيل كل شي و يخلي البشرة نظيفة ونقيّة.. اول شي ابلل وجهي بالموية واخذ من الصابون و اعمل مساج دائري ببطان كف يدي و حول العين اسوي مساج بأصباعي الخًنصر اخلص و اشفط وجهي بالموية وبعدها احط اي غسول بس يكون جداً خفيف و استخدم فرشاة تنظيف الوجه اللي عندي أولاي و تشوفي كيف حتى الفرشة نظيفة مافيها إلا رغوة الغسول بس .. يسلموو ايديكي ع التدوينية

    ReplyDelete
    Replies
    1. بس حبيت أضيف انه هذه الطريقة تزيل حتى الأرواج المات الثابتة !

      Delete
  5. ان شاء الله أجرب الطريقه بالزيت , لان المناديل ابدا مو مريحه وماتشيل من قلب

    ReplyDelete
  6. اتعب دايم لمن اشيل مكيب العيون وغيوني حساسة مرررا
    كنت متحمسة اشتزي مزيل المكيب من بودي شوب واللحين اتحمست اشتريه
    يسغدك ربي اسوم ياررب

    ReplyDelete
  7. وعليكم السلام ورحمة الله وبركاته ♥️
    قريب من روتيني هههههه
    كنت استخدم بودي شوب الزيت بس انقطع ، وبديت استخدم حق ماك بعدها اشيل الباقي من عيوني بغارنييه المزيل المائي واسوي روتيني من غسول وترطيب ..الخ
    جربت زيت جوز الهند طلع لي حبوب :(

    شكرًا أسماء ♥️

    ReplyDelete
  8. جد كنت استثقل ازالة المكياج من قبل خاصة العيون لدرجة احياناً ما كنت احط ماسكرا بس الحين مع التعود الحمدلله وطريقتي ازيل المكياج بقطنة ومزيل مائي بعدين ارجع اشيل البقايا بمناديل ازالة المكياج وبعدها اغسل وجهي بس دايم اعاني بسبب عيوني لانها تتحسس بسرعه
    وتوني اخذت مزيل من ذا فيس شوب واستخدمته مرتين وماتحسست منه للحين واتمنى يمشي معي

    زيت جوز الهند ماقد فكرت ازيل فيه حمستيني اجربه ان شاء الله المره الجايه بجرب اشيل فيه

    ♥️ يعطيك العافية

    ReplyDelete
  9. ماشاء الله موضوع يجنن ومدونتك روعه وادمان ٣>
    بسآلك << تتوقعي حتى الكحل الجاف حق العين وقلم الحواجب اذا مامسحناهم تمام يضروا البشره ؟؟

    ReplyDelete