Tuesday, August 5, 2014

روتين عنايتي بمنطقة حول العينين / My Eye Care Routine


السلام عليكم ورحمة الله وبركاته
أهلا بالحلوين اللي بتخلص إجازتهم قريب وهاذي التدوينة مخصوصة لكل من بيرجع يداوم وعموما لكل بنت ممكن أفيدها بروتين عنايتي بمنطقة حول العين، جربت منتجات كثيره قبل سنين وكلهم كانو من الصيدلية جربت الرولر من غارنييه، كريم العين من لوريال وكريم العين من بوندس بس مالقيت منها فايده أبدا ولاحتى كانو يخففون السواد أو الإنتفاخ عشان كذا قررت أتجه لماركات الهاي اند وبالتحديد الماركات الطبيه مثل كلارنس وكلينيك هي مو طبيه ميه بالميه بس عالأقل منتجات مفيده وشفت نتيجتها خلال هالسنتين ونصف

 يلا نبدأ:



من أهم الأسباب عشان يخف الانتفاخ وتقل الهالات السودا هي ( المويا ) مهم تشربين حصتك اليومية من المويا، سبق وذكرت بالانستقرام معلومة من الدكتور عبدالله المليفي كيف تحسبين حصتك اليومية من المويا وهي معادلة بسيطة ( وزن جسمك بالكيلو X ٣٥ مل ) وبالتالي الناتج يكون حصتك اليومية من المويا وذكر إن هذي المعادلة للي أعمارهم مابين 16 إلى 45 سنة وتختلف عند اللي عندهم أمراض مزمنه مثل السكري والضغط أو حتى اللي مسوين تكميم..

شي ثاني ومهم بقد المويا مهمه وهو ( النوم الصحي ) لازم تكون ساعات النوم من بعد الساعة 9 إلى 5 الصباح!  المهم يكون موعد النوم قبل منتصف الليل وتكون عدد ساعات النوم من 7 إلى 9 ساعات، لاتستهينون بالنوم الصحي هو يغير كل العادات السيئة اللي تصير للبشره والجسم ترا انا انام من ٩ يسموني الدجاجة *ـ*

شي أخير وهو إنتبهي على أكلك: كثري من العصير والسموذي، دخلي الخضار والفواكه لأكلك اليومي، إستبدلي الطحين الأبيض والساونديتش الأبيض إلى الأسمر وغير كذا كثير من العادات الصحية الجيدة اللي لازم تتغير لأن التغيير الخارجي يبدأ من الداخل..

كم وحدة تهتم بقناع العيون؟
صرت أستخدم ماسك العيون Cold Eye Mask قبل شهرين تقريبا مرتين إلى ثلاث مرات بالأسبوع مثلا طالعه لمناسبة، عندي صداع، عيوني منتفخة! طريقة إستخدامي وهي الطريقة الصح أحطه بالفريزر ساعة وبعدين أجيب شاش وأحطه على منطقة العيون وأحط فوقه الماسك وأخليه ربع ساعة، سويت عنه ريفيو بانستقرام، أخذته من صيدلية الكحال/ الدمام

 كل يوم لمن أنظف وجهي الصباح أو بالليل، أحط هالسيروم من كلينيك حول العين Clinique all about eyes serum كأول خطوة، يساعد على تقليل الانتفاخ وطريقتي أحطه وأسوي مساج بطرف أصبعي البنصر ( إصبع الخاتم ) وفيه كل إستخدامي لمنتجات العيون أستخدم هالأصبع لأن هو أرق اصبع على هالمنطقة، بالبداية ماعجبني وإستمريت أستخدمه سبعة شهور ولاشفت نتيجة بس قلت عادي المهم يعتني بالمنطقة لأن منتجات العيون والبشره عموما تبغى لها وقت يعني أقدر أقول سنين عشان تبين النتيجة، الحين صار لي سنتين ما أستغني عنه

بالصباح أستخدم جل من كلارنس Clarins Eye Contour Gel Puffiness, dark circles للتقليل من الهالات السودا والإنتفاخ للعين

 وبالليل قبل النوم أستخدم كريم مرطب من كلارنس Clarins Eye Contour Balm Softens fine lines ينعم الخطوط اللي تطلع تحت العين ويساعدني اليوم الثاني لمن أحط مكياج هالخطوط تخف ( هالمنتج ما أستغني عنه) ويناسب جميع انواع البشره

أستخدم كريم العين من بينيفت Benefit Its Potent Eye Cream قبل المكياج أحطه وأستنى لمن ينشف بعدين أحط الكوركتور والكونسيلر والباودر ( قرأت معلومه أن عشان تخففين من الخطوط اللي تحت العين بوقت المكياج حاولي تحطين كريم للعين قد ماتقدرين لأن الكريم يعبي الخطوط ويصير طبقة بين الكونسيلر وبين البشره جربتها بالمناسبات ونفعت بس ماقدرت أيام الدوام لأنها تحتاج وقت عشان ينشف الكريم) هالمنتج ما أستغني عنه اللي عندي عيينه بس يخلص بشتري الحجم الأصلي

الحين بقولكم عن منتجات البشره اللي أستخدمها وبالنهاية أمررها على منطقة العيون:
 زيت الماركوجا من تارت Tarte Pure Maracuja Oil ( من المنتجات اللي ماأستغني عنها أبدا)

 أقطر ثلاث قطرات على يدي من داخل وأحرك اليدين مع بعض لمن تدفى وأحطه على البشره الجافة وعلى رقبتي قبل النوم وإذا بقى أحطه تحت العين وتحت الحواجب، المنتج ثقيل ومايصير تحطينه تحت العين مباشره

بأيام الكسل مالي خلق أسوي الروتين أحط من هالسيروم من كلارنس للوجه Clarins White Plus Hp Intensive Whiting Smoothing Serum واللي يبقى بأصابعي أمرره على العيون وبعده أحط كريم العين من بينيفت اللي تكلمت عنه.

* دائما إستخدمي إصبع البنصر لأن هو أخف أصبع يلامس هالمنطقة الرقيقة ودايما أي منتج يكون تطبيقه بالطبطبة مو بالسحب والضغط القوي..
* الإهتمام بمنطقة حول العينين مهم جدا وحاولي دايم تكون منتجاتك من الماركات الطبيه الهاي اند وبعدي عن منتجات الصيدلية لأن لو بتعطيك نتيجة بتكون فوريه وبالنسبه لي مهمة النتيجة المستقبلية..

أتمنى روتين عنايتي بعيوني أفادكم، شاركوني منتجاتكم للعنايه بمنطقة العيون، حابه أعرف !

وبس. إذا حبيتو البوست إنشروه بتويتر أو بالانستقرام
تواصلو معاي على حساباتي:
إيميل: ThatRedLip@gmail.com
تويتر: ThatRedLip@
أنستقرام:ThatRedLip@
 سناب شات: ThatRedLip
 أسماء


6 comments:

  1. حبيت الموضوع يجنن ماشاء الله
    انا توي شاريه من ايستي لودر سيروم للعين
    وبعد كريم مرطب من شركة ثانية لماحول العيني
    والله كريمات العناية هي اهم شي خاصة للترطيب و تبان عالمدى الطويل
    شكراً على ذكرك المنتجات وتفصيلك
    :*

    ReplyDelete
    Replies
    1. العفو هيا (:
      باللست كاتبه سيروم ايستي لودر للوجه وللعيون لازم اجربهم

      Delete
  2. ماركة تارت وين القاها؟

    ReplyDelete
  3. With Eye Secrets Eye Lifter you get one of the best of both worlds. You obtain your magnificence back and without expensive surgery.
    eyelid lift without surgery

    ReplyDelete