DIY: Makeup Brush Cleaning Board/ إصنعيها بنفسك: لوحة تنظيف فرش المكياج

السلام عليكم ورحمة الله وبركاته

من أكثر من سنتين نزل قفاز تنظيف المكياج من سيقما والحين طوروه بحيث يكون يلصق على المغسلة
كنت مهملة هالموضوع وأقول بس تسويق وإعلان للمنتج وأنا مو بحاجته
وجا يوم وقلت ودي أسويه وأجربه فبحثت كيف ممكن أقدر أسويه
والطريقة مره سهلة وسريعة وماتصدقون قد إيش أنا أحب هالبورد من جد ريحني في تنظيف فرش المكياج وصار وقت غسيلها سهل مره
في هالتدوينة بوريكم كيف سويت اللوح والتدوينة الجاي كيف إستعملت هالبورد

اللي تحتاجينه:
- ClipBoard ملف بلاستيك حامل الأوراق ( أخذته من جرير )
- مسدس حراري ( أخذته من الزامل  )
- ورقة وماركر ( خياري )

أنا حبيت أخطط وأسوي نموذج إيش راح أسوي على حامل الأوراق قبل لا أشتغل عليه بالصمغ
تقدرين تستغنين عن هالخطوة


جهة اليسار بتكون الخطوط والنقط صغيره ونحيف وهي مخصصة لفرش العيون
وجهة اليمون الخطوط والنقط بتكون عريضة وبشكل أكبر لفرش الوجه

وبدأت أشتغل على البورد زي المخطط اللي سويته مسبقا
بدأت بالنقط على خط مستقيم

خطوط مستقيمة
 وبعدين شكل التموجات
في جهة اليمين اللي هي لفرش الوجه عدت على الجهة مرتين عشان أعرض الخطوط
لأن فتحة الصمغ اللي عندي صغيرة

خطوط متعرجة

نقط بشكل مائل

خليت البورد ينشف لمدة يوم قبل الإستعمال مع أنه مايحتاج بس إحتياطا
وبعد يوم غسلت البورد بمويا
- تقدرين تسوين الفكرة على أي بورد مسطح عندك مثلا: صحن مستطيل، قطاعة الخضار وغيره مو شرط تلتزمين بحامل الورق
- تقدرين تسوين أي نوع من الخطوط والنقط وبراحتك يعني ممكن تكتفين بنوعين أو ثلاث أو تغيرين على حسب اللي تبغينه

في التدوينة الجاية بغسل الفرش بإستخدام لوح تنظيف فرش المكياج
لاتنسون تسوونه ترا سهل ومايحتاج شي
وإذا سويتوه إرسلوه لي تطبيقاتكم عشان أنزلها في التدوينة الجاية ❤❤

إيميل: ThatRedLip@gmail.com

تويتر: ThatRedLip@

أنستقرام:ThatRedLip@

 سناب شات: ThatRedLip

 أسماء