الجزء الأول: روتين عنايتي بشعري! First part: My Hair Routine


السلام عليكم ورحمة الله وبركاته..

ورجعت بتدوينة جديدة وكانت مطلوبة كثير! ما أحب لمن أنقطع عن التدوين، تطلع لي أفكار كثيره وأبغى أنفذها وأكتبها وأشاركها معكم بس قاتل الله الكسل ..

المهم في تدوينة اليوم بتكلم عن روتيني الحالي في عنايتي بشعري بس أول شي تعرفو على نوعية شعري p;
شعري نوعيته خفيفه - ناعم- عادي 
كيرلي ومن النوع اللي يكش بسرعه
لونه بني غامق وفيه لمعة الكستنائي ماتبان إلا بالشمس يعني مو واضح! ولون شعري الطبيعي عاجبني بس تعرفون لازم التغيير، وخاصه قبل فتره كانت الموضه هو البني الأشقر فقلت لازم أجربه
صبغته أكثر من خمس مرات، كنت بالسنه أصبغه مرتين! بس توقفت من سنتين عشان أبغى أعالج شعري

في هالتدوينة بوريكم أفضل المنتجات اللي ناسبت شعري ومن مفضلاتي!

نبدأ:
 كولكشني الحبيب اللطيف 


ونبدأ أول شي بوقت الشاور:
الشامبو اللي ما أستغني عنه وهو من مفضلاتي على إني جربت غارنييه، دوف، هيربل ايسينس ولوريال بس تريسمي الأفضل عندي يكفي العبوه إقتصادية، وريحته تقعد بالشعر، وتنظيفه عميق وله أكثر من نوع يناسبون الشعر! إذا خلص بشتري تريسمي بس نوع ثاني! طريقة إستخدامي للشامبو أحط بيدي شوي شامبو مع قطرات مويا عشان يخفف المنتج وأبدأ من جهة ( تاج الشعر) يعني مو من مقدمه الشعر وبعدين أنزل تحت للأطراف واللي يبقى أحطه في مقدمة الشعر..
من صيدلية الدواء بس ماني مفتكره سعره /;
 بعد ما أغسل شعري من الشامبو وتحت الشاور وشعري مبلل أستخدم ماسك  Chaacoca intense hair repair treatment mask with Argan oil  هالماسك فظيييييع وكلمه جميل شوي عليه، ريحته جميله جميله بزيت الأرغان المغربي العضوي يخلي شعري مترطب وناعم لمن أمشطه وتقريبا يفك التشابك بنسبة قليله، إسمه شعكوكه بالمغربي يعني كشه عندنا هههههه يعني ترا يالبنات اللي شعوركم كاشه هذا لكم، إذا خلص برجع أشتريه لأن من جد حبيته وناسبني ..
أخذته من متجر anachicstore@ بـ 130 ريال
ومره بالأسبوع أو مرتين أسوي حمام زيت بهالمنتج  Swarovski Bonawell repair formula
ريحته مقبوله نوعا ما بالقمح ويحتوي على فيتامين B5 عالأقل بالنسبه لي أحسن من ريحة المشمش p;
 بعد ما أخلص من شاور ويصير شعري مرطب شوي أحط منه على الأطراف وألفه بفوطه مبلله مويا حاره لمده 15 دقيقة
من صيدلية الدواء تقريبا بـالعشرينات
أحلى شي أستخدمه لشعري هالفتره هو هالزيت Chaacoca Argan oil treatment 
بعد ما أنشف شعري  أحط شوي بيدي وأمرره من أطراف الشعر وصولا إلى نصف الشعر من الجهة اللي برا لأن جهة الشعر الداخليه ناعمه ومو كاشه زي برا، ريييييييحته جميييله وأحب أشمها بشعري وشوفو علبته فخمه مره  ♡ـ
واللي لاحظته أنه غير لي لون الشعر المصبوغ وصار شوي يلمع يعني ما أنصح فيه للي شعرها مصبوغ لأن بيغير اللون، بالنسبه لي حبيت لأن كان شعري باهت جدا وعطاه زي اللمعه
العيب الوحيد هي إني لازم أحط شوي منه على يدي وأحيانا بالغلط أصب كثير ..
أخذته من متجر anachicstore@  بـ 184 ريال
بعدين أبخ 3 بخات على شعري من زيت المكاديميا Macadamia Healing Oil Spray
صار لي سنة ونص أستخدمه ولسا ماخلص، مره ممتاز ويعالج الشعر، أتوقع الكل عارف عن مكاديميا ومنتجاتها وأفضل ماعندهم بالنسبه لي هالبخاخ يسوى كل ريال..
 من نزيه بميه وشي 
آخر شي لمن ينشف شعري شوي وأحس إنه تعبان من إستخدام السشوار وألة الكيرلي أستخدم LOREAL ELVIVE colour protict styling cream أحط نقطتين على شعري من الأطراف وصولا إلى منتصف الشعر عشان تخف الكشه وأحيانا بعدها أجدل شعري وأفتحه بعد وقت ويعطي شكل شعري ويفي كبير ومرتب..
ماصارو يبيعونه الحين حسافه ):

هاذا الجزء هو الأول وتكلمت عن عنايتي بشعري
في الجزء الثاني بتكلم عن الحبوب والسيروم والامبولات اللي أستخدمها 
وفي الجزء الثالث بتكلم عن عنايتي بشعري وقت التعرض للحراره

إيميل: ThatRedLip@gmail.com
تويتر: ThatRedLip@
أنستقرام:ThatRedLip@
 سناب شات: ThatRedLip
 أسماء

أحبكم كثير وآسفة عالتقصير 
Much Much Love, ASMA xo

3 comments

  1. ماشاء الله مدونتك جدا رائعة, أنا مبتدئة في المكياج و دائما مدونتك تفيدني بالمكياج و حتى العناية بالشعر و البشرة
    ألف شكر و دمت بصحة وعافية

    ReplyDelete
  2. روعه روعه روعه مدونتك استفدت منك كثير مشكوووووورة والله يوفقك
    متابعتك بالانستقرام:tabuk_cook

    ReplyDelete
  3. مرررره روعه البوست كثير عجبني
    وحمسني انزل بوست عن الشعر
    بحفظ الله

    ReplyDelete